خلّي صوتها على جنب: هيدي أحلام أو... كوابيس؟!

ليش اثرياء العرب بيحبوا يظهروا حيطان بشرية مشنشلة بالدهب؟

الفنانة قلب مش دكانة جوهرجي...

كنا اتفقنا زاوية «وجه الأسبوع» لأهل السياسة. بنظري ما في فرق بين الفن والسياسة اللي بيقولوا انها فن الممكن، وهيي فن المستحيل.

قررت أكتب عنها وقت اللي شفتها عم تستعرض طائرتها الخاصة. تذكرت باريس هيلتون، بنت كونراد هيلتون، صاحب سلسلة فنادق «هيلتون» اللي كانت تفاخر انو ثمن سكربينتها بيطعمي كافيار لكل سكان التشاينا تاون بنيويورك.

عرفنا انو شنطة احلام من تصميم «هرمس». لحد هلأ ماشي الحال. ليش ما بتعمل أحلام متل باريس هيلتون عارضة أزياء ونجمة استعراض لأنو كل حياتها استعراض باستعراض؟

اللي عم تعملو أحلام أكتر بكتير من اللي عملو نرسيس الاغريقي بس شاف صورتو بالمي. بدل الـ Narcissisme الـAhlamicisme

ما حدا بيعترض على صوتها اللي بيجمع بين نكهة الصحراء ونكهة االقمر. رزق الله على أيام الرندحة ع ضهر الناقة. ما بنتصور انو كتار اللي بيتحملو أفكارها الغريبة... الغرائبية.

وقت اللي كانت عم تستعرض طيارتها، شي عجيب، الفنانة المرهفة ما تذكرت انو في ولاد باليمن عم بيموتو من الجوع. مش عم ياكلو ورق الشجر المطبوخ بس. عم ياكلو التراب المطبوخ كمان.

اديش بتشعر بالنشوة وقت اللي بيوصفوها بـ«الملكة». صحيح، صحيح. مش هيك بيعملو ملوك العرب؟ قلوب متل الرخام بين حيطان الرخام وعيون الحراس اللي متل الحجارة.

أحلام هاجمت انجلينا جولي لأنها تبنت طفل سوري. خافت انو موسى ما يتربى تربية اسلامية كأنو اللي بيتربى تربية مسيحية، أو تربية بوذية، أو تربية هندوسية، مش انسان. نحنا جماعة تورا بورا بنربي ولادنا افضل من انجلينا جولي اللي تبنت حتى أطفال من اثيوبيا لانقاذهن من المجاعة.

أكتر من هيك. احتجت على قيادة المرأة السعودية السيارة لأنو المملكة «بلد مقدس». يا أبا بكر البغدادي، دخيلك، وين ساطورك؟!

الطريف انو احلام اللي رفضت قيادة المرأة السيارة باعتبار المرأة عورة، ومكانها الخزانة أو برميل المازوت، عادت وغنت بـ«البلد المقدس» وبالمسرح اللي غنى فيه جون ترافولتا. ما بعرف اذا وقت اللي سلطنت، صارت ترقص الروك اند رول.

طبيعي انو يكون في لمسة نرجسية بكل فنان. عنا ببلادنا النرجسية متل الكوليرا. السنكري بيتصور حالو أهم من ألبرت اينشتاين. والعنزة بتغار منها الليدي غاغا. بس ممكن استعراض التفاصيل الفاخرة بالطائرة الفاخرة اللي ثمنها بيأمن الطعام لأهل تعز، واهل الحديدة، وأهل مقاديشو لعشر سنين؟

هيدا اسلام؟ ليش بعد في اسلام بها الايام؟؟ آلاف السعوديين احتجو لأنو احلام نزلت من الطائرة من دون العباية السودا والحجاب. يا جماعة، وين حداثة محمد بن سلمان؟

نرجسية، ماشي الحال. اللي بنعرفو انو الفنانة هيي الرهافة. هيي القلب اللي بيرقص التانغو مع الياسمين، مش «الملكة» اللي مشنشلة. اللي ما بتشوف الجثث، وما بتشوف الهياكل العظمية، عم بتطل من الشباك.

شفتو شي مرة ام كلثوم، او فيروز، مرصعة بالدهب من فوق لتحت، ومن تحت لفوق؟ لو كان بالامكان، كانت أحلام غيرت جلدها بجلد من الدهب والألماس.

يا ست أحلام، صوتك أهم من كل الدهب. مش التياب اللي من دهب. الحنجرة اللي من دهب..

نحنا مش ضد انك تعيشي عيشة الملوك، ومش عم نقلّك تطبخي متل فيروز برغل ع بندورة (هيك قال زياد). كوني واثقة انو اللي عندن قلب، وبيتمتعو بصوتك، وبتوصلن آهاتك، مش الملوك. هودي الناس اللي يمكن مايكون عندن خبز. بس بقلبن كل مجوهرات الدني.

هيدا التاج، شوفي اذا الملكة اليزابيت بتشتريه، ووزعي بثمنو سندويشات للأطفال اللي عم بيدقوا ع أبواب السما، وما حدا عم يفتحلن الباب...