أديش في بصدرها أشياء واشياء ؟ اذا فتحت صدرها بيصير زلزال بالبلد. بالمنطقة كمان...

أديش خايفة من الأيام؟ بعد ما الرفيق غاب ما عاد في وهج لأي شي، وما عاد في مستقبل لتيار المستقبل. كل اللي عم بيحصل بها الايام... تقطيع ايام.

كتير متشائمة الست بهية. اللي جمعوا مئات الملايين من ورا رفيق الحريري، ومن ورا سعد الحريري، وينن هلأ؟

أم نادر بتعرف شو صار بابنها نادر. كانت تتوقعلو مستقبل كبير، كبير كتير. بس العصا الغليظة ما بترحم حدا. العقل الغليظ كمان ما بيرحم حدا.

وخلّي أحمد «يفشّخ» ليل نهار، ومن محل لمحل، لانقاذ ما يمكن انقاذه...

ياريت أحمد بيغيّر هالبضاعة اللي كتار جوا وبرا عم بيتاجرو فيها. «حزب الله»، وسلاح «حزب الله». هيدا كلام بومبيو مش كلام صيدا اللي تصدت بسنانها لدبابات آرييل شارون ولعسكر آرييل شارون.

بأحيان كتيرة بتتطلع بعيون اللي ببيت الوسط. بتسأل... أديش في نفاق، وأديش في انتهازية، واديش في زبائنية بهيدا البلد؟

هيدا هوي لبنان. هيديك الأيام ما عادت ترجع. وقت اللي كانت كلمة أبو بهاء عند الملك ما تصير تنين. هلأ، وين الملك ووين نائب الملك؟

أشياء كتيرة تغيرت بقصر اليمامة. أشياء كتيرة تغيرت بقصر الاليزيه. الدني بتبرم، وما عاد أمام السراي الا قصر بعبدا. مين كان يتصور هالصحبة، وهالعشق، بين القصر والسراي؟

ما في خيار غير هالخيار. كتار ببيروت، وبطرابلس، وببيروت بيراهنو انو بيت الحريري يتسكر متل ما تسكرت بيوت قبلو. وين بيت الصلح؟ ووين بيت سلام؟ ووين بيت كرامي ووين ووين؟

أم نادر هيي قديسة العيلة. ما حدا قدها خايف ع العيلة. بالانتخابات كان واضح وين هيي ووين فؤاد السنيورة...

بنتصور انو اللي بيحكوه جماعة السعودية بيوصل للست بهية. وقت اللي بتفكر كتير بالسياسة، بتسأل: أيمت رح يصير توازن بين سوريا والسعودية؟

مش قصدها الـ«س.س». هيدي بعيدة كتير ما دام دونالد ترامب بالبيت الأبيض. عم نحكي عن التوازن. الوضع المثالي انو يكون الشيخ سعد نصو بالرياض، ونصو بالشام، والنص التالت ببيروت.

رصيد العيلة كان رفيق الحريري. شوي، شوي، بيغيبو الناس الكبار عن الذاكرة. ورصيد العيلة كان المال. ما في شي بها البلد أهم من اله المال.

غريب، بالميتولوجيات القديمة كان في اله للعشق، واله للجمال، واله للمطر، واله للكواكب، واله للنار. ما كان في اله للنفط، واله للمال...

كيف سقط سهواً من خيال الفينيقيي اللي كانو ملوك صيدون ان يخترعوا اله للمال. أحفادن، مهما راحوع الكنائس، ومهما راحو ع الجوامع، ما عندن اله غير اله المال...

ما عاد في مال. هالشي كتير شاغل الست بهية. ما بدها العيلة تصير ع الحديدة. نادر ذكي، ومدبر حالو بالتجارة. بس أحمد شو مستقبلو بتيار المستقبل، وشو مستقبل تيار المستقبل؟

بس تشوفو حالة العشق بين القصر والسراي بتعرفو الجواب. التنازل كتير منيح لمصلحة البلد. الناس بتتمنى التنازل لمصلحة البلد والنزول عن ضهر البلد.

في دمعة عالقة بعيون الست بهية. حمالة الأسيّة. غيرها, كم في واحد حول الشيخ سعد بيشبه... حمالة الحطب؟!