نبيه البرجي

ما في أخفّ من دمّو بس يحكي بأي شي ما عدا السياسة. بس يحكي بالسياسة بيصير مصطفى علوش ... تأبط شراً .

وين الغرابة ؟ السياسة بلبنان مزاد علني مفتوح على اللحوم البشرية ...

هيدا الرجل كلثومي الهوى. بيعيش أم كلثوم، وبيغني لأم كلثوم. كيف ممكن شخص متلو، ومش طائفي أبداً، بينزل ع الخندق الطائفي، وبيحكي من هونيك ... بالـ «haut parleur»؟

يا دكتور مصطفى، ناس كتير بتحكي عن أبوك. زعيم حي بطرابلس، وألف كتاب حول «انتروبولوجيا المكان»، عبقرية المكان (كبّرنا كتير القصة)، وكان نص قلبو مع جبل محسن والنص التاني مع باب التبانة لأنو قلبو قلب طرابلسي. قلب الطرابلسي، قبل التسونامي (وهلأ بعد التسونامي) بيساع الدني. ع الأقل، بيساع نص الدني .

أول مرة بحكي عن مصطفى علوش بها الطريقة المخملية. هيدا رجل من عائلة ناصرية، وبيخبرك كيف جمال عبدالناصر صالح عبد الوهاب وأم كلثوم. وياريت كل زواج بالاكراه بيجيب غنية متل ... انت عمري !!

شايفين الزواج بالاكراه بين اللبنانيي شو عم يجيب. الله يستر ...

الناصري مع كل بارودي موجهة ضد اسرائيل. خبّرونا ابوك كان يقول. مش بس بدي انتقم للجنود المصريين بسينا. بدي انتقم لأحذية الجنود المصريين اللي مشت عليهن الدبابات بالصحرا ...

كيف بتصير ضد اللي ضد اسرائيل. انت عقلك كبير. بتتصور انو ايران فيها تاخد حبة تراب من لبنان، وحبة تراب من سوريا. كل العرب، وكل ثروات العرب، وكل عروش العرب، جوّات المشروع الأميركاني. مش هيدا اللي دمر عبد الناصر وحلم عبد الناصر؟

تقيل الدم كتير اللي قال ع مواقع التواصل بس سمعك عم تغني من الزمن الجميل «كم عملية تجميل، وبيصير مصطفى علوش ... هيفا وهبي» !

للي كتب هيك. صحيح انو الدكتور حلق شواربو من شان الجاذبية. وصار يهتم أكتر بهالكم شعرة الباقيين ع راسو. بس كاريزما مصطفى علوش، وقت اللي ما بيكون «تابط شراً»، مش بشكلو.

بحياتو ما قال أنا آلان ديلون أو حسين فهمي. الكاريزما بخفة دمو، وبخفة أصابعو بغرفة العمليات. أهم من هيدا كلو ابتسامتو لأهل المريض قبل العملية وبعد العملية .

مصطفى علوش، انت ع ضفة وأنا ع ضفة. بالسياسة بس. الطائفية، والمذهبية، هيدي لعنة يهوذا اللي مش رح تخلي حجر على حجر بالمنطقة.

انت اللي قلت « بركي اذا غنينا بيفهمنا المواطن لأنو بالسياسة ما حدا عم بيفهم ع حدا». هيدي سياسة فيفي عبده. لا، حرام فيفي عبده، كتير مهضومة (متلك). وحرام تحية كاريوكا (رقصة الهوانم)، وحرام سامية جمال (رقصة الخيول) .

عنا السياسة متل رقاصات مسرح فاروق بساحة البرج ايام زمان. كانو الرقاصات يدهنو جسمن بزيت الخروع حتى يلمع ويجذب الهربانين من نسوانن أو الهربانين من الدني .

الو حق الدكتور يزعل من سعد الحريري لأنو ما رشحو ع النيابة. سمعنا مين بيقول انو «سمير الجسر معبّي مركزو»، وانو محمد كبارة بيفهم الشارع والشارع بيفهمو (أبو عبد الطرابلسي ع وزن أبو عبد البيروتي). من شو بيشكي مصطفى علوش؟

أهل طرابلس بيحكو عنو بالخير. شخصية طرابلسية قالتلنا « بنفهم انو الدكتور مصطفى يسأل بشو محمد كبارة أحسن مني، بس ممكن يسأل ... الست ديما بشو أحسن

مني ؟». ولو بسلامة معرفتو، ديما بروفسورة بالجامعة الأميركية، واسألو عنها بالأمم المتحدة، وبنت رشيد الجمالي، وحلوة وأنيقة ووجهها، لولا شوي، متل ... انجلينا جولي.

... «وأنا، وأنا، بروفسور كمان، وجذاب كمان، وابن محمد علوش اللي وصل صيتو لعنترة بن شداد» !

ما أحلاك بعيد عن السياسة. أديش بتتغير بس تقرّب من السياسة. انت محسوب ع الصقور. شوي شوي بتصير حمامة.

عرفنا انك رجعت ع الجامعة لتدرس فلسفة. يا دكتور، شو بدك بأريسطو، وأفلاطون، وديكارت، وكانط، وهيغل. مش رح قلك شو بدك بابن رشد اللي كان ضد الاكليروس بالاسلام. اللي فهمو الدين مقبرة، أو زنزانة، أو مذبحة ...

صوتك حلو. بدل كل هالفلاسفة اللي بيكسّرو الراس غني لأم كلثوم، ولعبد الوهاب، ولعبد المطلب، ولأسمهان، ولفريد الأطرش ...

السياسة اللي كانت مفخرة صارت مسخرة. عتمة وزبالة وطرقات محفترة وضمائر متل عربات الموتى ..

للّي بيحبوك بنقول. شي النهار بتشوفو هالاعلان ع الحيطان «ليلة عيد العشاق مع مطرب العشاق مصطفى علوش». عاشق بس لمرتو. هيك قال. فيكن تصدقوه، وفيكن ما تصدقوه .

مطرب أفضل بكتير. من جراحة الجسد لجراحة الروح. «واثق الخطوة يمشي ملكاً». بالسياسة، ما فيك الا تكون خيال حدا أو زلمة حدا ...

أيمت رح تقول «أنا مش خيال لحدا، ومش زلمة حدا « ؟ بدك الحقيقة، ما حدا بيعود يسمع فيك ...