نبيه البرجي

ما تنسو انو اسم «ريا» بيعني النسيم العليل. صاحبة المعالي... النسيم العليل !

وعدت بلمسة خاصة بالوزارة. وزارة الداخلية بالكعب العالي وأحمر الشفاه. لبنان دخل بالقرن الحادي والعشرين.

أيمت رح نشوف معالي الوزيرة ببريتال وبحي الشراونة. لازم نقلّها انو الناس اللي هونيك بيشبهو الأرض، وبيشبهو الجبال، وبيشبهو القمح. مش صحيح انن بيشبهو الحيطان، وبيشبهو الحشيشة، وبيشبهو مدافع الهاون.

الحديث عن وزيرة الداخلية ما بيخلينا ننسى نهادالمشنوق اللي عمل حالو خط ماجينو وقت اللي كان سعد الحريري بمحنتو الفظيعة. يا استاذ نهاد، خط ماجينو الفرنسي سقط أمام أدولف هتلر، بدك خط ماجينو اللبناني ما يسقط أمام محمد بن سلمان ؟

صحيح واحد كبير كتير، وكلمته ما بتصير تنين، قللو للشيخ سعد «اطلع على أعلى جبل بلبنان، وارمي نهاد المشنوق من فوق ؟».

ليش ؟ لأنو قال نظامنا ديمقراطي لا نظام قبائل ولا نظام بيعة ومبايعة. ..

صاحبة المعالي، كانت المهمة اسهل لو جيتي بعد أبو ملحم اللي ما كان يعرف طول الحدود بين لبنان وسوريا، واللي صار ضيف شرف ع برامج التسلية والترفيه. جيتي بعد نهاد المشنوق اللي راسو ملان، واللي بيعتبر راسو أكبر من راس السنيورة و راس أي واحد تاني بالتيار الأزرق والخرزة الزرقا.

الاستاذ نهاد اجا ع الوزارة متل الدبابة «بتعرف مع مين عم تحكي ؟». اي بعرف. .. مع آتيلا الجبار !

ما حدا متل المشنوق. كل حياتو من حبل المشنقة لحبل المشنقة. هلأ وين ؟؟

الوزيرة شيك ومهفهفة. اللي بيعرفوها ساعة بيقولو متل السنونو، وساعة بيقولو . .. طرابلسية ومتل زهر الليمون.

لازم نقللها ما فيكي تبقي ورا مكتبك. وزارتك وزارة المهمات المستحيلة. صحيح عندك اللواء عماد عثمان واللواء عباس ابراهيم مكفيّين وموفييّن، بس انتي لازم تكوني ع الأرض، مش بس بالكعب العالي. بالصوت العالي.

كتير الناس انبسطو فيكي. أهل السياسة بيتصورو الأمن ع الطريقة العثمانية تكشيرة وكرباج. ليش ما بيكون الأمن متل الدول اللي فيها الانسان انسان. ابتسامة وزهرة قبل محضر الضبط ع السيارة.

شو قولكن بابتسامة ريا الحسن ؟ مش عم نسألكن عن ابتسامة انجيلينا جولي. بدنا ابتسامة انجيلينا جولي. ..

الست ريا، الجايي من عالم الأرقام، بنتمنى عليها ما تنظر للناس انن أرقام. ارقام فوق، وأرقام تحت، وارقام تحت التحت. ..

هيدا اختبار كبير الك، فيكي تفرضي رأيك وتقولي «هيك بدي». اعملي متل ما عمل العماد جوزف عون. لأول مرة ما في واسطة، وما في مصاري، بالمدرسة الحربية.

خلينا نكون صريحين. وقت اللي ما بيكون في واســطة (وتبويــس ايدين). وقت اللي ما بيكون في مصاري (ودين بينخّي الجمل)، بيكون ضمير الدركي متل التلج، مش ناطر منين بتجي الرزقة.

اذا عملت ريا الحسن هيك، شو بيصير بالانتخابات. بدكن كتلة المستقبل تصير خمسة او عشر نواب ؟

هيدا الكلام مش مظبوط. اللبنانيين بحاجة للعدالة، وبحاجة للشفافية. خللي وزيرة الداخلية تضرب بالكعب العالي، وتقول هيك «هيك بدي». بتخلي كتلة المستقبل تدوبل نوابها و تدوبل وزراءها.

هيدا جانب من القصة. اللي بيهمنا انو بلبنان وزيرة داخلية. متل ما هيي خبيرة بالأرقام خبيرة باللي بدن اياه الناس. هلكنا من شريعة الغاب. الكبير بياكل الصغير.

وعدتنا بلمسة خاصة : «مش رح قللكن ناموا وبوابكم مفتّحة. بدي قللكن. .. ناموا بكرامة وفيقوا بكرامة».